Menaxheri i Prengës mohon kurdisjen ndaj Joshuas, zbulon ethet para ndeshjes

XHEDAH — Menaxheri i Kristian Prengës, Keith Sullivan, hodhi poshtë publikisht çdo teori për kurdisje pas humbjes së boksierit shqiptar ndaj britanikut Anthony Joshua. "Mund t'i sqarojmë shumë lehtë me një fjalë: e pamundur. Nuk kishte asnjë ndikim të jashtëm", tha Sullivan për talkSPORT.

Prenga befasoi tifozët në rundin e parë të duelit, duke e rrëzuar dy herë Joshuan, para se britaniku të rikthehej fuqishëm dhe të fitonte me nokaut teknik në rundin e dytë. Ndryshimi i madh nga një raund në tjetrin ushqeu teoritë se diçka mund të mos kishte shkuar siç duhej.

Sullivan mohoi edhe pretendimin se persona të lidhur me organizatorët apo kompanitë e eventit kishin ndërhyrë në këndin e Prengës gjatë ndeshjes. "Turki Alalshikh nuk ishte fare në Xhedah. Edhe ideja se dikush nga Sela kishte ardhur në këndin tonë dhe kishte folur me ne, nuk është e vërtetë. Shikoni pamjet, nuk ka ndodhur", tha ai.

Sullivan zbuloi një detaj të panjohur më parë: Prenga ishte sëmurë rëndë para ndeshjes. "Nuk bëri sparing dhe nuk u stërvit për dy javë para se të shkonte në Xhedah. Kishte temperaturë 102 gradë dhe qëndroi tetë ditë në shtrat", tha menaxheri, duke shtuar se fillimisht mendohej për grip apo lodhje të madhe.

Sipas Sullivan, koha e rikuperimit ndikoi në raundin e dytë: "Kur nisi raundi i dytë, ai më tha se ndihej sikur ishte kthyer sërish në atë shtrat, pa energji dhe duke luftuar për frymë". Menaxheri theksoi se nuk kërkon justifikime: "Ishin pesë minuta e gjysmë nga momentet më emocionuese të boksit që kam parë prej kohësh".

Burim: Insajderi
— Redaksia ZHURMA