Londra mbështet dëshmitë e reja për krimet e luftës në Kosovë
Instituti për Krimet e Luftës në Kosovë paraqet një hap të rëndësishëm në dokumentimin e krimeve
PRISHTINË — E dërguara speciale e Mbretërisë së Bashkuar për Ballkanin Perëndimor, Dame Karen Pierce, ka vlerësuar punën e Institutit për Krimet e Luftës në Kosovë pas publikimit të dëshmive të reja, duke theksuar se ato paraqesin një hap të rëndësishëm në dokumentimin e krimeve të luftës dhe në kërkimin e drejtësisë për viktimat.
Pierce theksoi se dokumentimi i bazuar në fakte është thelbësor për zbardhjen e së vërtetës dhe për vendosjen e llogaridhënies për krimet e kryera gjatë luftës. Gjetjet janë një kontribut i rëndësishëm drejt krijimit të dëshmive të bazuara në fakte dhe llogaridhënies për më shumë se 13 mijë njerëz që humbën jetën ose u zhdukën gjatë konfliktit në Kosovë.
Pierce e përshkroi luftën në Kosovë si një nga episodet më të rënda të historisë së fundit evropiane, duke nënvizuar se një paqe e qëndrueshme mund të ndërtohet vetëm përmes ballafaqimit të sinqertë me të kaluarën. Ajo ritheksoi se Mbretëria e Bashkuar do të vazhdojë të mbështesë përpjekjet për forcimin e paqes, stabilitetit dhe sigurisë në Kosovë dhe në të gjithë rajonin e Ballkanit Perëndimor.
Burim: Gazeta Metro
— Redaksia ZHURMA