Kush paguan çmimin kur subvencionet e bujqit vijnë vonë?

PODUJEVË — Fermerët e paguajnë çmimin kur ndihmat vonojnë: humbin sezonin, kanë rendimente më të ulëta dhe çmimet në treg u ngjiten, thotë analisti Shenoll Muharremi, i cili kritikoi kryeministrin në detyrë Albin Kurti pas vizitës së tij në Podujevë, gjatë fushatës së korrje-shirjeve.

"Mirë që paska dalë pak KM në detyrë nëpër ara me i pa fermerët e bujqit… por kishte qenë shumë më mirë sikur ai dhe qeveria t'i kishin kryer punët dhe obligimet me kohë dhe t'i kishin ndarë ndihmat/subvencionet vjetore për bujqit," shkroi ai në Facebook.

Analisti rikujton se jemi në korrik, disa javë para përfundimit të sezonit, e ende qeveria s'ka ndarë asnjë cent nga ndihmat e rregullta vjetore. Fermerët kanë nevojë për to që në fillim të sezonit, për të paguar punëtorët dhe për të blerë pleh e karburant.

Kur ndihmat vijnë vonë, në vjeshtë apo dimër, rrezikohet dështimi i sezonit. Këtë vit as akciza dhe TVSH-ja e naftës nuk u hoqën, kur çmimi i saj u ngjit në gati 2 euro për litër, pikërisht kur bujqit duhej të punonin intensivisht me makineri.

Muharremi pyet nëse qeveria, në vend të investimeve reale në bujqësi, zgjodhi t'u ndajë qytetarëve nga 100 euro para zgjedhjeve, për të fituar më shumë vota. Ndihmat e vonuara, thotë ai, mund të përfundojnë duke i bërë fermerët të paguajnë rrymën e shtrenjtë të dimrit, ndërsa paratë shkojnë te xhepat e tregtarëve të rrymës.

Pasoja: më pak produkte vendore, më shumë import, çmime më të paqëndrueshme dhe deficit më i lartë tregtar me jashtë. "Një punë e pati qeveria e tij, dhe atë nuk e bëri. Tash, lehtë është me ba foto," përfundon Muharremi.

Burim: Gazeta Metro
— Redaksia ZHURMA