Çfarë tha Kurti për krimet e luftës në masakrat e 14 majit 1999?

PRISHTINË — Kryeministri Albin Kurti ka përkujtuar sot mbi 120 civilë shqiptarë të vrarë në masakrat e Qyshkut, Zahaqit, Pavlanit dhe Llabjanit të Pejës, krimet e kryera nga forcat serbe gjatë muajit maj të vitit 1999.

Kurti rikujtoi se më 14 maj 1999, forcat e armatosura të Serbisë sulmuan fshatin Qyshk dhe zonat përreth, ku burrat shqiptarë u ndanë nga gratë dhe fëmijët, u dërguan në tri shtëpi, u vranë dhe më pas shtëpitë u dogjën bashkë me trupat e tyre.

Ai përmendi edhe masakrën e Korishës të përkujtuar një ditë më parë, ku më 13 maj 1999 u vranë 77 civilë, ndër ta 14 fëmijë. Sipas Kurtit, gjatë javëve të para të majit 1999, "makineria ushtarake dhe policore e Serbisë po zbatonte projektin gjenocidal 'Patkoi' në Kosovë", duke përmendur masakra të tjera në Nabërgjan, Studime, Bukosh, Saradran, Carrabreg dhe Gjakovë.

Kryeministri theksoi se drejtësia për këto krime ka qenë e ngadaltë, duke kërkuar ndëshkimin e autorëve dhe urdhërdhënësve. "Kosova nuk mund të falë e as të harrojë krimet që shteti i Serbisë kreu gjatë luftës në Kosovë. Serbia e deshi tokën tonë pa neve. Por ne jemi ende këtu dhe po e forcojmë Republikën tonë", deklaroi ai.

Burim: Zëri
— Redaksia ZHURMA