Kur synon KQZ-ja të përmbyllë numërimin e votave nga përfaqësitë?
Zëdhënësi i Komisionit Qendror të Zgjedhjeve, Valmir Elezi, deklaroi se pas përfundimit të këtij procesi do të nisë menjëherë numërimi i votave me postë.
PRISHTINË — Procesi i numërimit të votave të ardhura nga përfaqësitë diplomatike të Kosovës po vazhdon në Qendrën e Numërimit dhe Rezultateve (QNR). Komisioni Qendror i Zgjedhjeve (KQZ) synon që ky proces të përmbyllet tërësisht gjatë ditës së sotme, e premte, për të vazhduar me fazat e tjera të votave nga jashtë.
Zëdhënësi i KQZ-së, Valmir Elezi, bëri të ditur se pas përfundimit të numërimit të këtyre votave, do të nisë menjëherë procesi i numërimit të votave të ardhura me postë. Elezi konfirmoi se përpjekjet e institucionit janë që ky proces i parë të mbyllet sa më shpejt.
Ky proces i numërimit ka nisur gjatë pasdites së enjtes. Deri në fund të asaj dite, numri i vendvotimeve të numëruara që u takojnë përfaqësive diplomatike ishte 13 nga 47 gjithsej. Mëngjesin e sotëm ka filluar puna me kutitë e tjera me synimin për t'i përmbyllur sot.
Paralelisht, po vazhdon edhe numërimi i votave për kandidatët për deputetë në Qendrat Komunale të Numërimit. Prishtina mbetet komuna e fundit në këtë proces, për shkak se ka një numër të madh të vendvotimeve që kërkojnë kohë për t'u numëruar plotësisht.
Burim: Demokracia
— Redaksia ZHURMA