Sa kërkesa për ndërrim vendvotimi refuzoi KQZ për zgjedhjet e 7 qershorit?

PRISHTINË — Komisioni Qendror i Zgjedhjeve ka pranuar 11.840 kërkesa për ndërrim të qendrave të votimit gjatë periudhës 6–17 maj, njoftoi të martën drejtori i Sekretariatit të KQZ-së, Besnik Buzhala. Prej tyre, 11.276 u aprovuan dhe 564 u refuzuan.

Në të njëjtën mbledhje, KQZ miratoi planin operacional të sigurisë për zgjedhjet e parakohshme parlamentare, si dhe programin e trajnimeve për zyrtarë zgjedhorë. U vendos gjithashtu dizajni i fletëvotimit, i cili do të përmbajë 21 subjekte politike të renditura sipas tërheqjes së numrave.

Votimi në përfaqësi diplomatike do të mbahet më 6 qershor, ndërsa ai në vendvotimet në Kosovë më 7 qershor. Në disa komuna, fletëvotimet do të kenë udhëzime edhe në gjuhë të tjera: turqisht dhe boshnjakisht në Prizren, turqisht në Mamushë, romisht në Obiliq dhe boshnjakisht në Dragash, në zbatim të Ligjit për Përdorimin e Gjuhëve.

Burim: Telegrafi
— Redaksia ZHURMA