Pse Kosova parashikohet të jetë ndër ekonomitë me rritjen më të shpejtë?

— PRISHTINË — Ministri në detyrë i Financave, Hekuran Murati, ka shpërndarë një artikull të Euronews, i cili, duke iu referuar parashikimeve të Fondit Monetar Ndërkombëtar (FMN), e rendit Kosovën ndër ekonomitë me rritjen më të shpejtë në Evropë gjatë periudhës 2027-2031. “Euronews sot ka publikuar një artikull ku tregon se sipas FMN-së, Kosova pritet të jetë ndër top vendet me rritjen ekonomike më të shpejtë gjatë viteve të ardhshme”, ka shkruar Murati në rrjetet sociale.

Raporti i FMN-së parashikon se Kosova pritet të ketë një normë mesatare rritjeje prej rreth 4 për qind në vit gjatë kësaj periudhe, dukshëm mbi mesataren e eurozonës e cila pritet të jetë vetëm 1.2 për qind. Sipas Fondit, motorët kryesorë të rritjes janë kërkesa e brendshme, konsumi i familjeve, investimet publike, remitancat e diasporës dhe struktura relativisht e re e popullsisë.

Megjithatë, analiza e Euronews e bazuar në raportin e FMN-së thekson se rritja ekonomike nuk lidhet me ndonjë sukses të veçantë të politikave qeveritare, por mbështetet kryesisht në konsumin e brendshëm, remitancat dhe importet e larta. “Dobësia është ana tjetër e së njëjtës medalje: rritja është e udhëhequr nga kërkesa dhe importi shumë i madh, vendi ende nuk ka ndërtuar bazë konkurruese eksporti”, thuhet në analizë.

Remitancat nga diaspora, kryesisht nga kosovarët në Gjermani dhe Zvicër, vazhdojnë të jenë një shtyllë kryesore e ekonomisë. Paratë që dërgojnë financojnë konsumin e familjeve, investimet në biznese, ndërtim dhe prona. Kësaj përzierjeje i shtohen shpenzimet publike në infrastrukturë dhe zgjerimi i sektorit bankar, duke mbajtur gjallë aktivitetin ekonomik.

Struktura e re e popullsisë së Kosovës mbetet një avantazh krahasuar me shumë vende evropiane që përballen me plakjen e popullsisë. Për më tepër, FMN shton se një shtysë shtesë për ekonominë mund të vijë nga zbatimi i Planit të Ri të Rritjes së BE-së për Ballkanin Perëndimor, i cili synon të përshpejtojë reformat dhe investimet.

Megjithatë, sfida kryesore për Kosovën mbetet krijimi i një ekonomie më konkurruese me prodhim më të madh vendor dhe eksporte më të larta. FMN vlerëson se ekonomia vazhdon të mbështetet në konsum dhe mallra të importuara, duke e bërë rritjen më pak të qëndrueshme në afatgjatë. Zhvillimi nuk duhet të varet kryesisht nga remitancat, konsumi dhe importet.

Burim: Demokracia, https://demokracia.com/

— Redaksia ZHURMA