Gurët dhe tekstilet bllokojnë kanalizimin — ujësjellësi apelon për kujdes

MITROVICË — Kompania Rajonale e Ujësjellësit "Mitrovica" ka apeluar te qytetarët të mos hedhin mbeturina në rrjetin e kanalizimit. Ekipet e mirëmbajtjes përballen me bllokime të shpeshta si pasojë e hedhjes së papërgjegjshme të mbeturinave. Në terren, kanë hasur në tekstile, peceta higjienike, gurë, materiale inerte dhe mbetje të tjera.

Këto veprime shkaktojnë bllokime të shpeshta, dëmtime të infrastrukturës, tejmbushje të kanalizimeve dhe shqetësime për qytetarët. Sipas KRU "Mitrovica", hedhja e papërgjegjshme e mbeturinave ndikon edhe në rritjen e kostove të mirëmbajtjes së rrjetit, ndërsa ekipet vazhdimisht përballen me bllokime gjatë ndërhyrjeve në terren.

KRU "Mitrovica" bëri apel te qytetarët të kujdesen për rrjetin e kanalizimit dhe të mos hedhin mbeturina. Kompania theksoi se një veprim i përgjegjshëm nga secili qytetar kontribuon në ruajtjen e një shërbimi më të mirë për komunitetin. "Kanalizimi është ndërtuar për ujëra të zeza, jo për mbeturina", thotë njoftimi i kompanisë.

Burim: Demokracia
— Redaksia ZHURMA