Pse Kadri Kryeziu këshillon koalicion VV-PDK për qeverinë e re?

PRISHTINË — Profesori Kadri Kryeziu ka vlerësuar se zgjidhja më e mirë për formimin e institucioneve të reja do të ishte një koalicion ndërmjet Lëvizjes Vetëvendosje dhe Partisë Demokratike të Kosovës, duke argumentuar se kjo do të siguronte stabilitet politik dhe votat e nevojshme për zgjedhjen e presidentit.

Në emisionin "60 Minuta" të KTV-së, Kryeziu ka kritikuar vendimin për mbajtjen e zgjedhjeve të 7 qershorit, duke thënë se vendi kishte tashmë Kuvend e Qeveri funksionale. "Kemi pasur Kuvend e Qeveri. Presidenti është çështje uniteti mes partive dhe nuk ka ndonjë rol të madh politik. Ka qenë veprim jo i duhur që për shkak të presidentit të shkohej në rrëzimin e institucioneve", ka deklaruar ai.

Kryeziu ka theksuar se me rreth 43 për qind të votave të siguruara nga Vetëvendosje, është e domosdoshme arritja e një konsensusi më të gjerë politik, veçanërisht për zgjedhjen e presidentit të ardhshëm. Ai ka vlerësuar se VV-ja duhet të ketë në qeveri një parti shqiptare, duke preferuar PDK-në para LDK-së: "PDK-ja për mua kishte me qenë më mirë, sepse kanë votat e mjaftueshme edhe për marrëveshjet ndërkombëtare, edhe për presidentin".

Ai ka paralajmëruar se mungesa e dialogut ndërmjet partive mund ta çojë vendin sërish drejt zgjedhjeve të reja. "S'kam hiç dëshirë që të riciklohet situata dhe të shkohet prapë në zgjedhje, por kjo mund të ndodhë nëse partitë nuk ulen të flasin në mënyrë normale", ka thënë Kryeziu.

Sipas rezultateve preliminare, pa numëruar votat e diasporës dhe ato me kusht, LVV-ja do të ketë 48 deputetë, PDK-ja 24, LDK-ja 20 e AAK-ja 8. Kryeziu ka sqaruar se fillimisht do të konstituohet Kuvendi, pastaj ushtruesja e detyrës së presidentes Albulena Haxhiu do t'i japë mandatarit të parë për formimin e Qeverisë, dhe më pas do të zgjidhet presidenti i ri.

Burim: Koha.net, https://www.koha.net/arberi/kryeziu-pdk-ja-duhet-te-hyje-ne-qeveri-me-vv-ne
— Redaksia ZHURMA