Gruda paralajmëron zhbërjen e Speciales përmes moszbatimit të ligjit

Deputeti i Partisë Demokratike të Kosovës, Përparim Gruda, ka deklaruar se moszbatimi i ndryshimeve në Ligjin për Dhomat e Specializuara mund t'i hapë Kosovës rrugën për të shqyrtuar shkëputjen e marrëveshjes me Bashkimin Evropian për Gjykatën Speciale. Gjatë një paraqitjeje, ai tha se jo të gjitha dispozitat e ligjit mund të kontestohen dhe se institucionet evropiane mund të prodhojnë raporte që do të shërbenin si bazë për dialogun me BE-në.

Gruda u shpreh se përmes mosrespektimit të këtij ligji dhe raporteve nga institutet evropiane, hapet rruga për ta zhbërë marrëveshjen dhe për të mbyllur Gjykatën Speciale. Ai shtoi se një shtet mund ta zhbëjë marrëveshjen edhe në mënyrë arbitrare përmes votimit të një ligji me 80 vota.