Filipçe: VMRO-DPMNE dhe BDI kanë marrëveshje për bllokimin e Kuvendit

Kryetari i LSDM-së, Venko Filipçe, ka deklaruar se partia e tij ka siguruar informacione për një marrëveshje mes VMRO-DPMNE-së dhe BDI-së për të bllokuar punën e Kuvendit. Sipas tij, kjo bllokadë do të shërbente si arsyetim për shpalljen e zgjedhjeve të parakohshme parlamentare.

Filipçe tha se informacionet për këtë skenar i kanë marrë gjatë ditëve të fundit dhe se bllokada do të shkaktohej përmes ndërhyrjeve procedurale të grupit parlamentar të BDI-së. Ai nuk dha detaje shtesë për bazën e pretendimeve dhe nuk saktësoi se kur mund të fillojë një bllokadë e mundshme.

“Ekziston marrëveshje mes grupit të organizuar kriminal të VMRO-së dhe BDI-së, që me ndërhyrje procedurale nga grupi parlamentar i BDI-së të bllokohet puna e Kuvendit dhe kjo të çojë drejt zgjedhjeve të parakohshme”, deklaroi Filipçe. Ai foli edhe për çështjen e ndërtimit të data-qendrave, duke ngritur pyetje për konsumin e energjisë elektrike dhe kapacitetet për objekte të reja prodhimi.

Pretendimet e liderit të LSDM-së vijnë në një periudhë kur debati për zgjedhje të parakohshme parlamentare është rikthyer në qendër të skenës.