FC Rinia nga Fushë Kosova garon në Ligën e Parë të futsallit

FC Rinia, klub i themeluar nga të rinj të komuniteteve Rom, Ashkali dhe Egjiptian, do të jetë pjesë e Ligës së Parë të futsallit në Kosovë për sezonin 2026/27. Kjo do të jetë paraqitja e dytë e skuadrës nga Fushë Kosova në garat e organizuara.

Fillimi i klubit lidhet me dëshirën e të rinjve të këtyre komuniteteve për të marrë pjesë në turne futbolli dhe futsalli, e cila me kalimin e kohës u shndërrua në një klub që garon zyrtarisht. Skuadra përballet me sfida të shumta, përfshirë vështirësitë financiare dhe organizative, pasi shumë lojtarë kanë prioritet punën dhe sigurimin e të ardhurave për familjet e tyre.

Në disa ndeshje, lojtarët janë përballur edhe me thirrje raciste, të cilat në klub i cilësojnë si raste të izoluara, duke theksuar se në shumicën e ndeshjeve me klubet shqiptare janë pritur me respekt. Mbështetja nga institucionet është e kufizuar: Komuna e Fushë Kosovës siguron palestrën për stërvitje, ndërsa Federata e Futbollit e Kosovës mbulon një pjesë të shpenzimeve të garave. Shpenzimet e tjera, si pagesat për ndeshje dhe udhëtimet, shpesh mbulohen nga vetë lojtarët.

Përfaqësuesi dhe lojtari Kajdar Haziri, si dhe menaxheri e lojtari Veton Mustafa, kanë thënë se FC Rinia nuk është thjesht një ekip sportiv, por një hapësirë ku të rinjtë bashkohen dhe përfaqësojnë komunitetet e tyre përmes sportit. Klubi ka filluar së fundmi të punojë edhe me gra.