Erdogan: Sulmet ndaj anijeve civile në Detin e Zi sjellin përshkallëzim

Presidenti i Turqisë, Recep Tayyip Erdogan, deklaroi se sulmet ndaj anijeve civile në Detin e Zi mund të shkaktojnë përshkallëzim të mëtejshëm të tensioneve në rajon, gjë që nuk i shërben interesave të asnjë pale. Deklarata u bë gjatë një konference të përbashkët për shtyp në Stamboll, ku ai priti në një vizitë pune presidentin e Ukrainës, Volodymyr Zelenskyy.

Gjatë takimit, dy liderët diskutuan për përpjekjet e shtuara me qëllim garantimin e lundrimit të sigurt dhe përmirësimin e situatës së sigurisë në këtë zonë strategjike. Erdogan shtoi se kompanitë turke që kanë qëndruar në Ukrainë pavarësisht luftës së nisur në vitin 2022 do të kenë një rol të rëndësishëm në rindërtimin e vendit, ndërsa shprehu gatishmërinë e Ankarasë për të kontribuar në arritjen e paqes.