Ekspertiza mjeko-ligjore zbardh vrasjen e shqiptares në Greqi

Ekzaminimi mjeko-ligjor në kombinim me gjetjet e tjera ka zbardhur detaje të reja rreth momenteve të fundit të 45-vjeçares shqiptare dhe mënyrës se si 48-vjeçari, gjithashtu shqiptar, e vrau atë në Nea Smyrni të Greqisë, për t'u vetëvrarë më pas.

Sipas informacioneve, 48-vjeçari po e priste 45-vjeçaren jashtë pallatit ku ajo jetonte dhe hyri në ndërtesë me të sapo ajo hapi derën e hyrjes. Brenda rreth tre deri në pesë sekondash, ai dyshohet se e ka goditur një ose dy herë me shqelm, duke e bërë të rrëzohej e të gjunjëzohej në tokë, ndërsa më pas i drejtoi armën. Pasi ajo u përpoq të mbrohej duke ngritur duart, autori dyshohet se humbi të shtënën e parë, e tërhoqi zvarrë me duar rreth një metër larg dhe e qëlloi përsëri në kokë. Pas krimit, autori e ktheu revolen nga vetja dhe kreu vetëvrasje me armë në posedim të paligjshëm.