Pse i quan DnV shkelje ligjore pagesat e Qeverisë në detyrë para zgjedhjeve?
Demokracia në Veprim e quan rast klasik të keqpërdorimit të resurseve publike në periudhë zgjedhore.
PRISHTINË — Demokracia në Veprim ka vlerësuar se vendimi i Qeverisë në detyrë për ndarjen e pagesave të njëhershme për kategori të ndryshme të qytetarëve vetëm pak kohë para zgjedhjeve përbën shkelje ligjore dhe rast klasik të keqpërdorimit të resurseve publike në periudhë zgjedhore.
Organizata citoi legjislacionin që ndalon përdorimin e burimeve publike për qëllime që ndikojnë në vullnetin e votuesve. Sipas DnV-së, kjo vlen për çdo formë, përfshirë buxhetin e shtetit, automjetet, zyrat dhe administratën publike gjatë fushatës. "Shpërndarja e pakove masive financiare krijon ndikim të drejtpërdrejtë në ambientin zgjedhor dhe cenon barazinë e garës ndërmjet subjekteve politike, duke krijuar avantazh të padrejtë për partinë në pushtet", thuhet në reagim.
DnV rikujtoi se Kuvendi i Kosovës nuk kishte miratuar iniciativën për plotësim-ndryshimin e ligjit për buxhetin, ku ishin paraparë mjete për një pako të tillë. Organizata vlerësoi se vendimi tejkalon dispozitat e Ligjit për Qeverinë, që kufizon mandatin e qeverisë në detyrë në vendime me implikime financiare, sidomos kur ato nuk burojnë nga planifikimi vjetor dhe buxheti aktual.
"Kjo situatë bëhet edhe më problematike nga fakti që ndihma financiare shpërndahet në mënyrë të përgjithshme dhe pa ndonjë situatë emergjente të re që do të arsyetonte masa të tilla urgjente", shtoi DnV, duke theksuar se mbështetja për qytetarët duhet të ndërtohet përmes politikave të qëndrueshme, të planifikuara dhe të trajtuara përmes procedurave të rregullta institucionale, e jo përmes vendimeve të improvizuara në prag të zgjedhjeve.
Demokracia në Veprim u bëri thirrje institucioneve të përmbahen nga përdorimi i resurseve publike në funksion të fushatës dhe të respektojnë standardet ligjore që garantojnë zgjedhje të lira dhe të ndershme.
Burim: Koha.net
— Redaksia ZHURMA