Si i quan DnV pagesat e Qeverisë në detyrë para zgjedhjeve?

PRISHTINË — Demokracia në Veprim vlerëson se vendimi i Qeverisë në detyrë për ndarjen e pagesave të njëhershme për kategori të ndryshme të qytetarëve vetëm pak kohë para zgjedhjeve përbën shkelje ligjore dhe "rast klasik të keqpërdorimit të resurseve publike në periudhë zgjedhore".

Organizata thekson se shpërndarja e pakove masive financiare krijon ndikim të drejtpërdrejtë në ambientin zgjedhor dhe cenon barazinë e garës, duke krijuar avantazh të padrejtë për partinë në pushtet. Legjislacioni zgjedhor ndalon përdorimin e resurseve publike për qëllime që ndikojnë në vullnetin e votuesve, përfshirë buxhetin e shtetit, automjetet, zyrat dhe administratën publike gjatë fushatës.

DnV rikujton se Kuvendi i Kosovës nuk kishte miratuar iniciativën për plotësim-ndryshimin e ligjit për buxhetin, në kuadër të së cilit ishin paraparë mjete për një pako të tillë. Vendimi, sipas organizatës, tejkalon dispozitat e Ligjit për Qeverinë, i cili kufizon mandatin e qeverisë në detyrë në marrjen e vendimeve me implikime financiare që nuk burojnë nga planifikimi vjetor dhe buxheti aktual.

DnV i bën thirrje institucioneve të përmbahen nga përdorimi i resurseve publike në funksion të fushatës dhe të respektojnë standardet ligjore. Raste të tilla, shton organizata, duhet të trajtohen nga mekanizmat përgjegjës për mbrojtjen e integritetit zgjedhor.

Burim: Zëri
— Redaksia ZHURMA