Çfarë kërkoi diaspora shqiptare në protestën e Melburnit?

MELBURN — Qindra shqiptarë nga e gjithë Australia dhe Zelanda e Re iu bashkuan revoltës kombëtare, duke zhvilluar një tubim masiv në Melburn, në ditën e protestës së 14-të radhazi në Tiranë, e cila po shënon pjesëmarrjen më të madhe ndonjëherë në një revoltë popullore.

Protestuesit kërkuan llogaridhënie nga zyrtarët publikë, transparencë në vendimmarrje dhe një luftë reale kundër korrupsionit dhe pandëshkueshmërisë. Ata ngritën pankarta me thirrjen “Duam patriot dhe jo piktor”, duke dënuar keqpërdorimin e pasurive publike.

Organizatorët theksuan se zëri i diasporës, e cila kontribuon për atdheun, duhet të dëgjohet fuqishëm. Ata rikonfirmuan moton “Atdheu nuk shitet” si një thirrje jetike për mbrojtjen e interesit publik, të drejtësisë dhe të demokracisë.

Mesazhi përfundimtar ishte për qytetarët në Shqipëri: megjithë zhgënjimet e 35 viteve të fundit dhe premtimet e pambajtura, besimi dhe shpresa për ndryshim nuk duhet të humbasin. Thirrja për rezistencë dhe mosdorëzim u bë përmes një tubimi që unifikoi zërin e shqiptarëve kudo në botë.

Burim: Almakos
— Redaksia ZHURMA