Deputeti i AfD-së: 92% e banorëve të Kosovës janë shqiptarë
Tobias Teich thotë se përbërja etnike e Kosovës nuk mund të injorohet dhe shprehet i hapur për të kontribuar në negociata.
Deputeti i AfD-së, Tobias Teich, ka deklaruar se përbërja etnike e Kosovës është një fakt që nuk mund të injorohet. Sipas tij, mbi 90-92 për qind e banorëve të Kosovës janë me prejardhje shqiptare, dhe kjo duhet të pranohet. Ai ka folur për çështjen e Kosovës dhe marrëdhëniet e saj me Serbinë, duke theksuar se zgjidhja mbetet e ndërlikuar për shkak të qëndrimit të Beogradit zyrtar.
Teich është shprehur se Serbia vazhdon ta quajë Kosovën provincë të saj, gjë që e bën të vështirë progresin në njohjen e Kosovës. Ai ka përmendur se mbi 100 vende e kanë njohur Kosovën dhe se duhet bërë diçka për të gjetur një zgjidhje për të ardhmen. Si shtetas gjerman, ai ka thënë se nuk dëshiron të thotë se kush ka të drejtë, por thekson rëndësinë e bisedimeve për një zgjidhje të pranueshme për të gjitha vendet.
Deputeti i AfD-së ka shprehur shpresën për shmangien e incidenteve kufitare mes Kosovës dhe Serbisë. Ai është shprehur i hapur për të kontribuar personalisht në lehtësimin e kontakteve apo negociatave mes palëve, duke thënë se mund të marrë përsipër këtë detyrë. Teich ka përmendur edhe rastin e Bosnjës, ku prania e trupave të huaja ishte pozitive për garantimin e sigurisë dhe parandalimin e përshkallëzimit të konfliktit.