Defekti në gyp lë pa ujë një pjesë të madhe të Prishtinës
Një pjesë e madhe e Prishtinës ka mbetur pa ujë për shkak të një defekti në gyp pranë Pallatit të Rinisë.
Redaksia ZHURMA · · 1 min lexim
PRISHTINË — Një pjesë e konsiderueshme e kryeqytetit ka mbetur pa furnizim me ujë gjatë ditës së martë, si pasojë e një defekti në një gyp me diametër 350 milimetra pranë Pallatit të Rinisë. Kompania Rajonale e Ujësjellësit “Prishtina” ka njoftuar se ekipet e saj kanë ndërhyrë dhe janë duke punuar në terren për riparimin e defektit dhe normalizimin e furnizimit. Zëdhënësja e KRU “Prishtina”, Arjeta Mjeku, ka bërë me dije se sanimi i problemit pritet të bëhet për 2 a 3 orë. Sipas njoftimit, ekipet teknike kanë qenë duke punuar që nga mëngjesi, ndërsa qytetarët janë ankuar për ndërprerjet e shpeshta. Ndërkohë, gjatë ditës së nesërme është paralajmëruar ndërprerje e furnizimit edhe në Obiliq dhe Milloshevë për shkak të punimeve të planifikuara në rezervuarin e qytetit, nga ora 09:00 deri në 18:00.
