Çfarë masa sigurie ka ndjekur KQZ-ja gjatë votimit me postë?

PRISHTINË — Komisioni Qendror i Zgjedhjeve ka dalë me sqarim të detajuar lidhur me organizimin e votimit me postë jashtë Kosovës, pas shqetësimeve të ngritura në publik. Komunikata e të enjtes shpjegon procedurat e ndjekura për regjistrimin e votuesve, dërgimin dhe pranimin e fletëvotimeve, si dhe masat e sigurisë gjatë gjithë procesit.

Regjistrimi i votuesve jashtë vendit ka përfshirë masa të veçanta sigurie. KQZ-ja ka sqaruar se procesi ka përmbushur disa aspekte sigurie, "në mesin e të cilave është fotografimi i aplikuesit derisa mban dhe njëkohësisht prezanton dokumentin e tij të identifikimit".

Çdo votues i regjistruar me sukses ka pranuar në adresën elektronike një dëftesë regjistrimi me të dhëna unike. Ky dokument, sipas KQZ-së, është i domosdoshëm për verifikimin e vlefshmërisë së pakos me fletëvotim.

Për votimin fizik në përfaqësi diplomatike janë miratuar 30 qendra votimi — 17 ambasada dhe 13 konsullata. Për votimin me postë janë hapur kuti postare në 22 shtete të ndryshme, përveç kutisë së përhershme postare brenda Kosovës.

Që nga Zgjedhjet Lokale 2025, KQZ-ja vetë i shtypë fletëvotimet, të cilat përmbajnë elemente të ndryshme sigurie. "Kjo praktikë, edhe përkundër kohës së shkurtër në organizimin e zgjedhjeve të parakohshme, është ndjekur në dy proceset e fundit zgjedhore për Kuvendin e Kosovës, të mbajtura në dhjetor dhe qershor", thuhet në komunikatë.

Pas tërheqjes nga kutitë postare, paketat evidentohen brenda objektit të postës dhe vendosen në thasë të mbyllur me lidhëse e shirit sigurie. Thasët ruhen pastaj në dhomat e sigurisë të përfaqësive diplomatike deri në dorëzimin si dërgesë diplomatike drejt Kosovës.

Vlerësimi i pakove pas mbërritjes në Kosovë është zhvilluar në prani të vëzhguesve të akredituar dhe përfaqësuesve të subjekteve politike. Zarfet janë hapur vetëm për qëllime verifikimi të dëftesës së regjistrimit, dhe të gjitha fletëvotimet që kanë përmbushur kriteret e përcaktuara janë procesuar për numërim. "Vëzhguesit e subjekteve politike kanë qenë prezentë pothuajse gjatë gjithë kohës" dhe "nuk kanë paraqitur asnjë vërejtje gjatë këtij procesi", thekson KQZ-ja, e cila nuk ka pranuar asnjë ankesë gjatë gjithë procesit.

Burim: Zëri
— Redaksia ZHURMA