Çfarë kërkon opozita nga Kurti para bisedimeve?

PRISHTINË — Kurti nuk ka dërguar ende ftesa te partitë politike për bisedimet mbi formimin e institucioneve, edhe pse KQZ ka certifikuar rezultatet e zgjedhjeve. LDK-ja thotë se është gati të takohet me kryeministrin, ndërsa AAK-ja kërkon plotësimin e gjashtë kushteve të veta para se të japë kuorumin për zgjedhjen e presidentit.

Sekretari organizativ i LDK-së, Visar Azemi, tha për RTV21 se Kurti deri më tani nuk ka bërë përpjekje serioze për një marrëveshje politike. Sipas tij, përpjekjet serioze kërkojnë takime dhe dialog të drejtpërdrejtë me partitë, oferta konkrete dhe gatishmëri për kompromis.

"Kosova ka humbur shumë nga bllokadat politike", tha Azemi, duke shtuar se çdo bisedë serioze duhet të jetë e hapur dhe e bazuar në një marrëveshje që i jep vendit stabilitet institucional, jo vetëm një zgjidhje të përkohshme për numrat në Kuvend.

Edhe deputetja e Aleancës për Ardhmërinë e Kosovës, Time Kadrijaj, thotë se Kurti nuk ka bërë përpjekje serioze për një marrëveshje politike. Sipas saj, ekziston rreziku që të përsëriten skenarët e kaluar, pasi Kurti mund të sigurojë 61 vota për qeverinë, por jo edhe 80 votat e nevojshme për zgjedhjen e presidentit.

Kadrijaj thotë se nëse Vetëvendosje garanton plotësimin e gjashtë kushteve të AAK-së, deputetët e saj do të qëndrojnë në sallën e Kuvendit për të mundësuar kuorumin. Në të kundërt, sipas saj, AAK-ja nuk ka arsye të qëndrojë në sallë.

Ndërkaq, Partia Demokratike e Kosovës do ta mbajë mbledhjen e Kryesisë për të vendosur qëndrimin e saj lidhur me takimet me Kurtin. Deri atëherë, formimi i institucioneve mbetet peng i heshtjes së kryeministrit dhe kushteve të paplotësuara të opozitës.

Burim: RTV21
— Redaksia ZHURMA