Sa do të kushtojë Censi i Bujqësisë pas 15 viteve pritje?

TIRANË — Censi i Bujqësisë do të kushtojë rreth 11 milionë euro dhe do të zhvillohet gjatë tetorit të vitit 2026, duke mbledhur të dhëna të detajuara mbi tokat, fermat dhe blegtorinë në të gjithë territorin e Shqipërisë. Procesi vjen 15 vite pas censit të fundit të zhvilluar në vitin 2012.

Drejtoresha e INSTAT, Lantona Sado, deklaroi se mbledhja e informacioneve në terren do të zgjasë gjashtë javë. Për këtë operacion do të angazhohet një armatë prej 3400 punonjësish anketues, të cilët do të menaxhohen nga 640 kontrollorë të institutit të statistikave.

Paralelisht, Komisioni i Ekonomisë miratoi projektligjin për "Dëftesat Tregtare Mbi Produktet Bujqësore". Sipas zëvendësministrit të Bujqësisë, Fatmir Guri, ky instrument synon të rrisë aksesin në financim duke lejuar që mbjelljet dhe produktet e magazinuara të përdoren si kolateral për kreditimin e fermerëve.

Guri shpjegoi se ligji formalizon një praktikë ekzistuese ku fermerët lënë garanci produktesh për të blerë fara dhe plehrues. Megjithatë, ai theksoi se bankat nuk do të detyrohen të pranojnë këtë instrument, ndonëse hapet rruga për pranimin e tij në të ardhmen.

Kritikë ndaj efikasitetit të këtyre masave ka ngritur deputeti i PS, Erion Braçe, i cili argumenton se dëftesat tregtare nuk zgjidhin mungesën e tregut. Braçe ankohej se çmimi i shalqirit ka rënë në 7 lekë për kg, duke e bërë të pamundur shlyerjen e detyrimeve ndaj bankave.

Sipas Braçës, kolaterali nuk ka vlerë kur çmimi i shitjes është shumë më i ulët se mesatarja e parashikuar prej 30-40 lekësh. Ministria e Bujqësisë dhe Zhvillimit Rural sqaron se dëftesat mund të lëshohen për të gjithë fermerët që posedojnë ose kultivojnë sipërfaqe bujqësore.

Burim: Shqiptarja
— Redaksia ZHURMA