Bie numri i nxënësve dhe studentëve në Kosovë

PRISHTINË — Agjencia e Statistikave të Kosovës (ASK) ka publikuar raportin e ri mbi statistikat e arsimit për vitin 2025/2026. Sipas këtyre të dhënave, Kosova ka shënuar rënie të numrit të nxënësve në arsimin parauniversitar dhe studentëve në arsimin e lartë.

Në arsimin parashkollor dhe çerdhe ka pasur një rritje të lehtë të pjesëmarrjes. Numri i fëmijëve të regjistruar arriti në 35.948, që paraqet 1.910 fëmijë më shumë se vitin paraprak kur ishin 34.038. Nga ky numër total, 24.422 fëmijë ndjekin çerdhet publike, ndërsa 11.526 të tjerë janë në sektorin privat.

Ndërkaq, rënie e ndjeshme është shënuar në arsimin fillor dhe të mesëm të ulët, ku numri i nxënësve zbriti në 198.639 krahasuar me 208.515 të vitit paraprak. Në shkollat publike mësojnë 194.314 nxënës apo 97,8 për qind, ndërsa në ato private vetëm 4.325 nxënës apo 2,2 për qind.

Gjatë vitit paraprak 2024/2025, shkollat private kishin 9.325 nxënës, gjë që tregon se ky sektor pësoi rënie të ndjeshme. Ndryshe nga kjo, përqindja e nxënësve në sektorin publik shënoi rritje, duke shkuar nga 95,5 për qind në 97,8 për qind këtë vit.

Edhe arsimi i mesëm i lartë shënoi rënie me 62.085 nxënës të regjistruar këtë vit krahasuar me 63.551 nxënës vitin e kaluar. Nga ky total, 56.892 nxënës vijojnë mësimin në sektorin publik, ndërsa 5.193 ndodhen në shkollat private, të cilat panë një rritje të lehtë në përqindje të pjesëmarrjes së përgjithshme.

Së fundmi, numri i studentëve në arsimin e lartë ra në 64.671, ku 34.208 studiojnë në universitetet publike dhe 30.463 në kolegjet private. Krahasuar me vitin paraprak, universitetet publike regjistruan më pak studentë, ndërsa kolegjet private shënuan rritje të numrit të regjistrimeve të reja.

Burim: ATSH
— Redaksia ZHURMA