BDI akuzon shtetin për diskriminim — 4.500 euro për Ditën e Romëve, Dodiku falas
BDI i kërkon Qeverisë të sqarojë pabarazinë dhe kërkon të dijë nëse VLEN e mbështet këtë trajtim.
SHKUP — Partia BDI akuzoi institucionet shtetërore për diskriminim ndaj romëve, krahasuar me serbët. Sipas partisë, shënimi i Ditës Ndërkombëtare të Romëve u faturua 4.500 euro, ndërsa manifestimi "Ditët e Shën Savës", ku mori pjesë Milorad Dodik, u organizua falas në një institucion kulturor shtetëror.
BDI kërkoi nga Qeveria të sqarojë pse dy ngjarjet nuk u trajtuan me të njëjtat standarde faturimi. "Për një event me Dodikun falas. Për Ditën e Romëve 4.500 euro. Për VLEN heshtje", thuhet në reagimin e BDI-së.
BDI e cilëson heshtjen e VLEN-it si problem shtesë dhe pyet nëse përfaqësuesit e tij e mbështesin këtë trajtim. Partia kërkon kritere të qarta, të barabarta dhe publikisht të aksesueshme për përdorimin e institucioneve kulturore shtetërore, pa favorizim politik, etnik apo partiak.
Burim: Almakos
— Redaksia ZHURMA