Ballkani në tregun e BE-së para anëtarësimit formal

Gjatë zhvillimit të Forumit të Shoqërisë Civile dhe Think Tank-ëve, ish-kryeministri i Italisë dhe presidenti i Institutit Jacques Delors, Enrico Letta, ka kërkuar një qasje ndryshe për zgjerimin, duke kërkuar që vendet kandidate të përfitojnë nga integrimi ekonomik edhe përpara anëtarësimit zyrtar në Bashkimin Evropian. Ky proces përfaqëson një mundësi për të afruar ekonomitë rajonale me standardet e përbashkëta. Autori i raportit «Një Europë, Një Treg» vuri në dukje se rajoni i Ballkanit dhe Shqipëria duhet të kenë mundësinë e anëtarësimit në tregun e përbashkët evropian në fazat e mëparshme të procesit.

Gjatë diskutimeve, ish-kryeministri italian theksoi domosdoshmërinë e zbatimit konkret të reformave dhe të integrimit gradual. Sipas tij, popujt e kontinentit kërkojnë rezultate të prekshme dhe jo vetëm premthe politike nga institucionet. Letta u shpreh se «Kur pashë titullin e këtij eventi, ‘Prova, jo premtime’, kuptova menjëherë se ky është titulli që duhet vendosur mbi derën e çdo institucioni europian». Ai shtoi se në rast se dështon lidhja mes zbatimit praktik dhe veprimeve në nivel kontinental, atëherë do të humbet vizioni i përbashkët. Sfida kryesore e Bashkimit Europian mbetet shndërrimi i planeve në rezultate reale për qytetarët.

Lidhur me aspektin ekonomik, u paralajmërua se fragmentimi i tregut dobëson pozitën ndërkombëtare të bllokut përballë konkurrencës globale. Edhe pse përfaqëson një nga ekonomitë më të mëdha në botë, rajoni evropian vuan nga ndarjet e brendshme në sektorin e financave dhe tregtisë. Qasja e re e propozuar synon pikërisht vendosjen e tregut të përbashkët në qendër të vëmendjes, duke u dhënë vendeve të interesuara mundësinë e bashkimit ekonomik paraprakisht.