Avokatët e Tate: Pasuria në rrjete sociale ishte ekzagjerim për show
Përfaqësuesit ligjorë të Andrew Tate pretendojnë se makinat luksoze dhe jahti i shfaqur në Instagram nuk ishin në pronësi të tij.
Influenceri kontrovers Andrew Tate ka ekzagjeruar pasurinë dhe stilin e jetesës në rrjetet sociale, sipas përfaqësuesve të tij ligjorë në një parashtresë drejtuar gjykatës në Florida. Ata pretendojnë se disa prej makinave luksoze dhe një jaht 50 milionë dollarësh të shfaqur në postime nuk kanë qenë në pronësi të tij.
Andrew Tate dhe vëllai i tij, Tristan, ndodhen në paraburgim në Florida dhe kërkojnë lirimin me kusht, ndërsa presin përfundimin e procedurave të ekstradimit drejt Britanisë së Madhe. Ata u arrestuan muajin e kaluar pasi prokurorët britanikë ngritën 38 akuza të reja, përfshirë përdhunim dhe vepra të lidhura me trafikimin seksual, akuza që të dy i mohojnë.
Prokurorët argumentojnë se vëllezërit përbëjnë rrezik për arratisje, duke iu referuar deklaratave publike për pasurinë dhe ndikimin. Por avokatët thonë se pasuria e paraqitur në rrjete sociale është pjesë e një strategjie për të tërhequr vëmendje dhe për të gjeneruar të ardhura. Jahti luksoz i përmendur nga prokurorët nuk është në pronësi të vëllezërve, ndërsa ata janë paguar për ta promovuar atë. Edhe automjete luksoze, përfshirë një Aston Martin dhe makina Bugatti, thuhet se ishin marrë me qira.
Andrew Tate u bë i njohur pas pjesëmarrjes në versionin britanik të “Big Brother” në vitin 2016. Ish-kickbokseri ka miliona ndjekës në rrjetet sociale. Aktualisht, dy vëllezërit përballen me gjithsej 59 akuza për vepra të dyshuara të kryera midis korrikut 2010 dhe gushtit 2017.