Arrestohet shtetasja gjermane në Kakavijë pas kontrollit me armë dhe kanabis

Një ngjarje e rëndë ka ndodhur në pikën kufitare të Kakavijës, ku autoritetet policore kanë ndaluar një shtetase të huaj e cila po tentonte të kalonte kufirin me armë dhe lëndë narkotike. Sipas njoftimit zyrtar, operacioni i koduar «Risku 2» është finalizuar pas kontrolleve të imtësishme të kryera nga Policia Kufitare në bashkëpunim me autoritetet doganore dhe Seksionin për Hetimin e Narkotikëve në DVP Gjirokastër. Gjatë këtij kontrolli të detajuar në skaner dhe më pas në vijën e dytë në dalje, automjeti dhe ruloti që drejtoheshin nga shtetasja gjermane janë përzgjedhur për verifikim të imtësishëm.

Në pranga ka rënë shtetasja A. S., e cila identifikohet gjithashtu si Alexandria Maria Schirmer, 51 vjeçe. Gjatë kontrollit të ushtruar në automjetin dhe rulotin e saj, shërbimet e Policisë kanë zbuluar të fshehura një armë zjarri pistoletë me mulli me municionin përkatës, si dhe gjashtë kavanoza dhe tri qese hermetike që përmbanin lëndë të dyshuar narkotike Cannabis Sativa, me peshë totale rreth 141 gramë. Përveç armës dhe lëndës narkotike, në cilësinë e provës materiale janë sekuestruar edhe vetë automjeti së bashku me rulotin, si dhe një telefon celular i përdorur nga drejtuesja.

Veprimet e para hetimore janë kryer nga specialistët për Hetimin e Narkotikëve në DVP Gjirokastër, të cilët bënë arrestimin në flagrancë të 51-vjeçares gjermane. Materialet procedurale i kanë kaluar për veprime të mëtejshme Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër. Ajo dyshohet se ka kryer veprat penale të «Trafikimit të narkotikëve» dhe «Trafikimit të armëve dhe municioneve».