Arlinda Pogaj jep dorëheqjen nga OBP pas 1,649 prokurimesh
Sa të qëndrueshme janë kursimet prej 42 milionë euro që la pas drejtuesja e OBP-së?
TIRANË — Drejtuesja e Operatorit të Blerjeve të Përqendruara (OBP), Arlinda Pogaj, ka dhënë dorëheqjen sot, duke e cilësuar periudhën e saj si "kapitull të rëndësishëm profesional" në ndërtimin e institucionit nga themelet. Ajo e prezantoi largimin gjatë konferencës së 1-vjetorit të ngritjes së OBP-së.
OBP ka realizuar 1,649 procedura prokurimi dhe ka shërbyer 242 institucione publike — spitale, qendra sociale, institucione sigurie, ushtri dhe polici. Pogaj theksoi se kursimet për buxhetin e shtetit arrijnë rreth 42 milionë euro. Ajo vlerësoi gjithashtu rritjen e transparencës dhe konkurrencës, standardizimin e proceseve, si dhe bashkëpunimin ndërkombëtar përmes nismave evropiane.
"Arritja më e madhe nuk janë shifrat, por njerëzit dhe stafi i OBP që e ktheu vizionin në institucion funksional", u shpreh Pogaj. Dorëheqja e saj vjen pa sqarim të arsyeve ose të planit të qeverisë për pasardhësin.
Burim: ATSH
— Redaksia ZHURMA