Çfarë kërkon Albanians for America nga partitë pas zgjedhjeve në Kosovë?
Organizata amerikane vlerësoi zgjedhjet si demokratike dhe paqësore, por theksoi urgjencën e formimit të institucioneve të reja.
PRISHTINË — Organizata Albanians for America ka përgëzuar qytetarët e Kosovës, institucionet përgjegjëse dhe subjektet politike për zhvillimin e zgjedhjeve të parakohshme për Kuvend, duke i vlerësuar ato si demokratike, paqësore dhe të rregullta. Në deklaratën e saj, organizata theksoi se votimi dëshmoi "pjekurinë demokratike" të qytetarëve, të cilët shprehën vullnetin e tyre në përputhje me standardet ndërkombëtare.
Pas përfundimit të procesit, organizata i bëri thirrje të gjitha partive politike të tregojnë përgjegjësi shtetërore dhe të angazhohen në dialog konstruktiv për formimin e institucioneve të reja. Ajo nënvizoi se Kosova ka nevojë për zgjedhjen në kohë të presidentit dhe një qeveri stabile që do të forcojë subjektivitetin ndërkombëtar të vendit. Po ashtu, theksoi se stabiliteti politik është kusht për progresin afatgjatë të rrugëtimit euroatlantik të Kosovës.
Burim: Telegrafi
— Redaksia ZHURMA