Sa votues nga diaspora u aprovuan nga KQZ për zgjedhjet e 7 qershorit?
KQZ ka aprovuar mbi 99 mijë aplikime nga diaspora, me Gjermaninë dhe Zvicrën si shtetet me numrin më të madh të regjistrimeve.
PRISHTINË — Mbi 99 mijë aplikime të votuesve jashtë Kosovës janë aprovuar deri të dielën nga KQZ, nga mbi 117 mijë kërkesa për zgjedhjet e parakohshme të 7 qershorit. Zëdhënësi Valmir Elezi tha se rreth 7 mijë aplikime janë ende në pritje të shqyrtimit.
Nga të aprovuarit, 22,955 janë regjistruar për votim fizik në përfaqësitë diplomatike, 2,590 për dërgim të pakos në kutinë postare të KQZ-së në Kosovë, dhe 73,953 për dërgim në kutitë postare jashtë vendit.
Numrin më të madh të regjistrimeve e kanë Gjermania me rreth 49 mijë dhe Zvicra me rreth 23 mijë. Pas tyre renditen Franca (4,193), Suedia (3,750), Austria (3,165), Britania e Madhe (2,370), Italia (2,206), SHBA (2,070) dhe Belgjika (2,024).
Afati i aplikimit përfundon sot. Votimi me postë fillon më 25 maj, ndërsa ai në përfaqësitë diplomatike organizohet më 6 qershor, një ditë para zgjedhjeve.
Burim: RTV21
— Redaksia ZHURMA