52-vjeçari qëllon me armë gjatë ahengut në Mramor, policia i merr armën
Policia i sekuestroi armën, tetë gëzhoja dhe lejen; Rexhep Gashi u lirua pas intervistimit, ndërsa rasti mbetet nën hetime.
PRISHTINË — Të shtënat me armë gjatë një ahengu familjar në fshatin Mramor kanë alarmuar Policinë e Kosovës, që i konfiskoi armën dhe lejen 52-vjeçarit Rexhep Gashi. Ndaj tij ka nisur procedurë penale për përdorim të paautorizuar të armës, sipas informacioneve që ka siguruar Sinjali.
Sipas burimeve, dje rreth orës 13:00 Policia mori një njoftim se në rrugën "Pellazgët" po dëgjoheshin të shtëna me armë. Njësitë policore dolën menjëherë në vendngjarje, ku hasën Gashin, i cili pranoi se kishte shtënë me armë zjarri gjatë ahengut, duke deklaruar se e posedonte me leje.
Hetuesit dhe ekspertët e forenzikës sekuestruan armën e zjarrit, karikatorin, tetë gëzhoja dhe dy fishekë të kalibrit 9×19, si dhe kartelën e lejes. Me urdhër të Prokurorit të Shtetit, Gashi u intervistua në prani të avokatit dhe u lirua në procedurë të rregullt; rasti mbetet nën hetime.
Burim: Sinjali
— Redaksia ZHURMA