30 deputetë të legjislaturës së kaluar mbeten jashtë Kuvendit
Kush janë politikanët që humbën mandatin pavarësisht se partitë e tyre fituan ulëse?
PRISHTINË — Më shumë se 90 për qind e votave të kandidatëve për deputetë janë numëruar, dhe rezultati tregon se 30 deputetë të legjislaturës së kaluar — që zgjati vetëm dy muaj e gjysmë — nuk do të kthehen në Kuvend.
Lëvizja Vetëvendosje pëson goditjen më të rëndë: 23 ish-deputetë të saj nuk siguruan mandat të ri. Mes tyre, Fatmire Kollçaku-Mullhaxha, Naim Bardiqi, Fjolla Ujkani, Ejup Ahmeti, Fitim Haziri, Vigan Qorrolli, Ilir Qeriqi, Salih Zyba, Drita Pajaziti, Arsim Demi, Agon Batusha, Luan Aliu, Egzon Azemi, Shqipe Isufi, Fahrush Rexhepi, Arjeta Rexhyepi, Avdullah Klinaku, Mytaher Haskuka, Bylbyl Sokoli, Bajram Mavriqi, Rozeta Hajdari, Fatos Geci dhe Enver Dugolli.
PDK-ja humb tre ish-deputetë: Ariana Musliu-Shoshi, Arbnore Salihu dhe Nait Hasani. LDK-ja humb vetëm një, Adelina Thaqi-Meta, pavarësisht se partia e saj rriti numrin e mandateve për pesë. Lista Serbe mbetet pa Milan Kostiq, Verica Cerniq dhe Nemanja Bisevac.
Bazuar në rezultatet preliminare, LVV ka siguruar 48 ulëse, PDK-ja 24, LDK-ja 20 dhe AAK-ja 8. Në përbërjen e re pritet të jenë 29 gra pa ndihmën e kuotës gjinore, ndërsa tre të tjera mund të hyjnë përmes saj.
Kuota gjinore do t'i lërë pa ulëse disa kandidatë burra në PDK dhe AAK. Në LVV, 16 gra kanë fituar ulëse pa kuotë. Në PDK, 5 gra nga 7 të kërkuarat e kanë siguruar mandatin. Në LDK, 7 gra kanë kaluar pa kuotë, duke e tejkaluar kërkesën prej 6. Në AAK, Albana Bytyqi futet në Kuvend, ndërsa Agim Çeku mbetet jashtë — përkundër se Ardian Gjini dhe Daut Haradinaj kanë paralajmëruar tërheqje që t'i hapin rrugë atij dhe Arbër Tolajt.
Albin Kurti mbetet deputeti më i votuar me mbi 219 mijë vota, pasuar nga Glauk Konjufca (172 mijë) dhe Albulena Haxhiu (100 mijë). Në PDK, Bedri Hamza kryeson me 107 mijë, ndërsa në LDK, Vjosa Osmani ka 72 mijë dhe Lumir Abdixhiku 65 mijë.
Burim: Koha.net
— Redaksia ZHURMA