23 mijë nxënës në Testin e Arritshmërisë më 26 qershor
Pse njohësit e arsimit kundërshtojnë anulimin e testit?
PRISHTINË — Rreth 23 mijë semimaturantë do t'i nënshtrohen Testit të Arritshmërisë më 26 qershor, kanë bërë të ditur drejtues të Ministrisë së Arsimit. Edhe këtë vit testi do të organizohet vetëm në një ditë.
Fatmir Elezi, udhëheqës i Divizionit për Vlerësim, Standarde dhe Monitorim në Ministrinë e Arsimit, tha për Radio Kosovën se nxënësit do të testohen në katër grupe lëndësh: gjuhë shqipe, gjuhë angleze, matematikë, informatikë, shkenca shoqërore, histori, gjeografi, shkenca natyrore, fizikë, kimi dhe biologji. "Katër grupet i kanë gati 25 kërkesa", tha ai.
Njohës të arsimit vlerësojnë se testi është jashtëzakonisht i rëndësishëm për orientimin e nxënësve drejt shkollimit të mesëm. Xhavit Rexhaj i tha Radio Kosovës se testi nuk duhet të anulohet siç është kërkuar më herët, por të analizohet mënyra e realizimit. "Ky e ka rolin e vet, ky e ka orientimin e nxënësit për shkollimin e mëtejmë", tha Rexhaj.
Rezultatet e testit u shërbejnë nxënësve të klasave të nënta për regjistrim në shkollat e mesme të larta.
Burim: Zëri
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.