Zvicra refuzon iniciativën SVP për kufizimin e popullsisë në 10 milionë

BERN — Zviceranët e refuzuan iniciativën populliste “Jo një Zvicër me 10 milionë banorë” që propozoi Partia Popullore Zvicerane (SVP), duke e konsideruar masën tepër ekstreme edhe pse pranojnë shqetësimet për rritjen e popullsisë.

Në reagimet e mbledhura nga 20 Minuten pas votimit, një numër i madh votuesish theksoi se mungesa e banesave, trafiku i rënduar dhe presioni mbi infrastrukturën janë probleme reale që sjell rritja e popullsisë. Megjithatë, sipas tyre, iniciativa nuk ofronte zgjidhje reale dhe rrezikonte marrëdhëniet e Zvicrës me Bashkimin Evropian.

“E shoh problemin e migracionit, por iniciativa ishte tepër ekstreme”, ishte komenti më i shpeshtë i votuesve pas publikimit të rezultateve. Shumë qytetarë theksuan se ekonomia zvicerane ka nevojë për punëtorë të huaj, sidomos në sektorë si shëndetësia, ndërtimtaria dhe shërbimet, dhe se kufizimi i ashpër i migracionit do të krijonte më shumë probleme sesa zgjidhje.

Rezultati i referendumit tregon se shumica e zviceranëve nuk mbështesin masa drastike për kufizimin e migracionit, por njëkohësisht presin zgjidhje konkrete për sfidat që sjell rritja e vazhdueshme e popullsisë. Megjithëse iniciativa u refuzua, debati për migracionin mbetet i fortë, pasi shumë pranojnë se rritja e popullsisë po ndikon në cilësinë e jetës.

Burim: Albinfo.ch
— Redaksia ZHURMA