Çmimet në Vlorë rriten gati dyfish gjatë sezonit turistik
Banorët kërkojnë ndërhyrje institucionale pasi pagat dhe pensionet nuk mbulojnë shpenzimet e rritura.
VLORË — Fluksi i lartë i turistëve po shoqërohet me rritje të ndjeshme të çmimeve në qytetet bregdetare, ku banorët e Vlorës thonë se çmimet e produkteve ushqimore janë rritur gati dyfish, ndërsa shërbimet në restorante, kafene dhe plazhe janë bërë më të shtrenjta krahasuar me vitet e kaluara.
Sipas qytetarëve, me pagat dhe pensionet aktuale u bëhet gjithnjë e më e vështirë të përballojnë shpenzimet e përditshme, pasi shtrenjtimi nuk prek vetëm produktet e shportës, por edhe shërbimet. Ata thonë se përfitimet ekonomike nga turizmi nuk po reflektohen në uljen e kostos së jetesës për komunitetin lokal, por po rëndojnë buxhetin familjar.
Banorët kërkojnë masa konkrete nga autoritetet për të monitoruar dhe kontrolluar rritjen e çmimeve, në mënyrë që sezoni turistik të mos rëndojë mbi standardin e jetesës së banorëve vendas.
Burim: Telegrafi
— Redaksia ZHURMA
