Trump pezullon sanksionet dhe tarifat e reja ndaj Rusisë

Presidenti amerikan Donald Trump ka pezulluar zbatimin e një pakete të re sanksionesh dhe tarifash ndaj Rusisë, pak para hyrjes së tyre në fuqi. Vendimi vjen afro një muaj pasi ai kishte nënshkruar një paketë të gjerë masash ndëshkuese të miratuara nga Kongresi me mbështetjen e të dyja partive kryesore. Në një urdhër ekzekutiv, Trump deklaroi se pezullimi i masave është në interesin kombëtar të Shteteve të Bashkuara të Amerikës.

Sipas mediave, legjislacioni synonte të kufizonte të ardhurat e Moskës dhe të ushtronte presion për shkak të luftës në Ukrainë, duke përfshirë tarifa deri në 100 për qind për pesë importuesit kryesorë të naftës dhe gazit rus, si Kina dhe India, si dhe sanksione ndaj zyrtarëve të lartë, bankave dhe të ashtuquajturës flotë në hije. Megjithatë, Trump vendosi t'i pezullojë ato, në një kohë kur arriti një marrëveshje për të blerë naftë nga Rusia për të ndihmuar në uljen e çmimeve të karburanteve dhe të energjisë. Sipas njoftimeve, Rusia do të vinte në dispozicion më shumë se 300 mijë tonë naftë diezel, e ndjekur nga sasi shtesë në muajt në vijim.

Ky hap ka nxitur reagime dhe përplasje, ndërsa presidenti ukrainas Volodymyr Zelensky deklaroi se marrëveshja për naftën do të thotë se paratë do të fillojnë të rrjedhin përsëri në Rusi. Edhe ligjvënësit amerikanë shprehën pakënaqësi, ndërsa marrëdhëniet mes Uashingtonit dhe Kievit janë përkeqësuar pas kritikave të Trumpit ndaj udhëheqjes ukrainase.