Zjarrfikësit shpëtojnë tre veta nga traktori i zhytur në lumin Devoll
Zjarrfikësit e Gramshit nxorën nga uji një të moshuar, nipin dhe shoferin te Bishti i Nartës.
GRAMSH — Një traktor mbeti i bllokuar sot në lumin Devoll, në vendin e quajtur Bishti i Nartës. Ekipet e Shërbimit Zjarrfikës Gramsh u nisën menjëherë drejt vendngjarjes, siç raportoi korrespondentja e Top Channel, Bruna Kërcyky.
Falë ndërhyrjes së shpejtë të zjarrfikësve, u shpëtuan tre persona që ndodheshin në mjet: një person i moshuar, nipi i tij dhe drejtuesi i traktorit. Vetë mjeti mbeti i zhytur në ujë deri në lartësinë e kabinës.
Zjarrfikësit bënë sërish apel se hyrja në lumin Devoll është tepër e rrezikshme, për shkak të prurjeve të papritura që vijnë nga diga e Moglicës, e cila mund të rrisë papritmas nivelin e ujit.
Burim: Top Channel
— Redaksia ZHURMA