Si u ngjit Shkëndija e Haraçinës në elitën e futbollit maqedonas?
Skuadra shqiptare nga Haraçina fitoi 6-5 ndaj Pelisterit të Manastirit në barazh, duke siguruar historikisht promovimin në Ligën e Parë të Maqedonisë së Veriut.
KAVADAR — Shkëndija e Haraçinës ka shkruar historinë duke u ngjitur për herë të parë në elitën e futbollit të Maqedonisë së Veriut. Skuadra shqiptare triumfoi ndaj Pelisterit të Manastirit me 6-5 pas penalltive, në ndeshjen e barazhit të zhvilluar në Kavadar.
Koha e rregullt përfundoi 1-1. Zani Nazifi shënoi për Shkëndijën në minutën e 53-të, ndërsa Petkovski barazoi me kokë në minutën e 90+8. Pelisteri kishte shansin të barazonte nga pika e bardhë në minutën e 66-të, por portieri Antonio Stolevski i priti penalltinë Ivanovskit.
Stolevski u bë hero i ndeshjes me pritje vendimtare gjatë lojës dhe në serinë e penalltive. Shkëndija e kishte mbyllur sezonin në vendin e tretë në Ligën e Dytë, ndërsa Pelisteri ishte i tetë në Ligën e Parë. Sezonin e ardhshëm Shkëndija garon mes më të mirëve; Pelisteri bie nga elita.
Burim: Telegrafi
— Redaksia ZHURMA