Shasivari fton studentët dhe dekanët për zgjidhjen e jurisprudencës

Ministri i Drejtësisë, Jeton Shasivari, ka njoftuar se do të ftojë në takim studentët dhe dekanët e fakulteteve juridike për t’u prezantuar zgjidhjen ligjore për provimin e jurisprudencës, përpara se çështja të marrë formën zyrtare. Sipas tij, zgjidhja është e njëjta që është prezantuar paraprakisht.

Shasivari ka thënë se në Ministri kanë arritur kërkesa që provimi, krahas gjuhës shqipe, të jepet edhe në gjuhën angleze dhe turke. Ai ka shtuar se presin edhe kërkesën e Universitetit Shtetëror të Tetovës dhe se në periudhën që vjen do të organizojnë takim konsultativ me përfaqësues të asociacioneve studentore dhe dekanëve.

Ministri ka theksuar se dialogu është i rëndësishëm për të adresuar çështje praktike si materialet e provimit, literatura juridike, pyetjet e provimit, kriteret profesionale të vlerësimit dhe përkthimi. Lidhur me qëndrimin e studentëve që e kanë hedhur poshtë zgjidhjen, e cila parashikon që teoria të jepet në gjuhën amtare dhe praktika në gjuhën maqedonase, Shasivari shprehet se do t’i bindë se bëhet fjalë për avancim.