Pse u shtrengtua sërish karburanti në Shqipëri?
Tensionet në Lindjen e Mesme dhe sulmet amerikane në Iran ngritën çmimin e naftës në bursë, duke e dërguar litrin e naftës deri në 188 lekë.
TIRANË — Rritja e çmimeve të karburanteve në Shqipëri vjen si pasojë direkte e tensioneve në Lindjen e Mesme, ku rinisja e sulmeve amerikane në Iran e shtyu çmimin e naftës së papërpunuar bruto në bursë nga nën 72 dollarë në mbi 78 dollarë për fuçi brenda një jave.
Kjo luhatje u reflektua menjëherë në tregun vendas, ku një litër naftë po shitet tashmë deri në 188 lekë, nga 176 lekë që ishte pas vendimit të fundit të Bordit të Transparencës. Gjithashtu, benzina u rrit në 184 lekë për litër, nga 166 lekë që kishte para tre javësh.
Shqipëria mbetet vendi me karburantin më të shtrenjtë në rajon, i shtati në Evropë dhe i dhjetëti në botë. Sipas të dhënave, vendi le pas shtete si Irlanda apo Monako, ndërkohë që në nivel global Hong-Kongu kryeson me çmimet më të larta, mbi 3.77 euro për litër.
Eksperti i tregjeve të investimeve, Maksim Caslli, shpjegon se efekti vjen kryesisht në mënyrë të tërthortë përmes tregjeve europiane nga ku Shqipëria importon më shumë. Ai vërehti se rritja me 4 dollarë në pak orë u ushqye edhe nga spekulimet, ndonëse gjykon se kjo luhatje mund të mos zgjasë shumë.
Rreziku për rritje të mëtejshme nuk vjen vetëm nga bursa ndërkombëtare, por edhe nga qeveria shqiptare. Nën peshën e taksave ekzistuese, në çdo litër naftë e benzinë pritet të shtohen dy tarifa të reja: ajo e gjurmimit dhe ajo e rezervës kombëtare të sigurisë.
Burim: Report Tv
— Redaksia ZHURMA