Pse po zvarriten punimet në rrugën rajonale Vushtrri–Skenderaj?
Edhe pse punimet kanë nisur para një viti, në këtë segment rajonal ka rrëshqitje dhe gropa të rrugës, ndërsa kompania pret aprovimin e punëve shtesë.
VUSHTRRI — Megjithëse punimet për rehabilitimin e rrugës rajonale R105 Vushtrri–Skenderaj kanë filluar gjatë vitit të kaluar, problemet në këtë segment të rëndësishëm vazhdojnë të mbeten të dukshme për qytetarët edhe pas afro një viti nga fillimi i tyre. Më 18.06.2026 janë evidentuar gropa në rrugë, pjesë të dëmtuara e të gërryera të asfaltit dhe rrëshqitje të dheut.
Lidhur me këto zvarritje dhe probleme, Ministria e Infrastrukturës ka dhënë shpjegime zyrtare përmes menaxherit të kontratës për këtë projekt, Abdyl Ymeri. Ai deklaroi se punët nuk kanë përfunduar ende për shkak të ndryshimit të gjendjes në terren që ka ndodhur midis fazës së hartimit të projektit dhe fillimit të punimeve.
Sipas menaxherit Ymeri, punimet sa i përket kontratës bazë kanë përfunduar në një shkallë prej mbi 94 për qind në terren. Pjesa tjetër që ka mbetur e papërfunduar është bërë objekt i shqyrtimit për punë shtesë të cilat, si rezultat i ndryshimeve të evidentuara, kanë dalë krejtësisht jashtë domenit të kontratës fillestare.
Sa i përket rrëshqitjes së trupit të rrugës që ka bllokuar njërën korsi për qarkullim, Ymeri tregoi se po ndërtohet muri mbajtës i saj për sanim. Ai potencoi se brenda një jave pritet që kjo korsi e bllokuar të lëshohet për qarkullim të plotë pasi të përfundojë ndërtimi i këtij muri.
Kompania e kontraktuar për kryerjen e punimeve në këtë segment rrugor është “ASFALT Corp.”. Visar Qorrolli, pronari i kësaj kompanie, sqaroi se punimet nuk kanë përfunduar ende për shkak të paraqitjes së nevojës për realizimin e këtyre punëve shtesë, të cilat nuk kanë qenë të parashikuara në fazën e parë të projektimit.
Pas miratimit të punëve shtesë administrativisht, kompania do të ndërmarrë masat e nevojshme për sanimin e dëmtimeve të asfaltit, rehabilitimin e pjesëve të gërryera dhe stabilizimin e zonës së rrëshqitur. Megjithatë, pronari Qorrolli theksoi se në këtë fazë nuk mund të përcaktojnë një afat përfundimtar e të saktë për mbylljen e punimeve.
Burim: Kallxo
— Redaksia ZHURMA