Mbi 50 mijë kosovarë hyjnë në Shqipëri për pushime
Pritjet në Pikën e Kalimit Kufitar të Morinës s'i kalojnë pesë minutat, teksa të gjitha sportelet punojnë me procedura të përshpejtuara.
MORINË — Mbi 50 mijë pushues nga Kosova kanë hyrë në Shqipëri vetëm gjatë dy ditëve të para të gushtit, që përkuan me fundjavën. Fluksi i shtuar i automjeteve në Pikën e Kalimit Kufitar të Morinës ka nisur që në fillim të javës, ndërsa mijëra qytetarë po i drejtohen bregdetit shqiptar për pushimet verore.
Autoritetet kanë vënë në funksion të gjitha sportelet dhe po punojnë me procedura të përshpejtuara. Lehtësimi zbatohet për automjetet me targa të huaja, që në pjesën më të madhe u përkasin mërgimtarëve nga Kosova, ndërsa makinat me targa të Kosovës dhe Shqipërisë kalojnë pa kontrolle, në bazë të marrëveshjes për lehtësimin e lëvizjes mes dy vendeve.
Pavarësisht numrit të madh, situata në kufi mbetet e qetë dhe pritjet nuk i kalojnë pesë minuta. Fluksi ishte i pritshëm, pasi gushti është kulmi i sezonit turistik. Autoritetet presin që ai të mbetet i lartë edhe ditët në vijim, veçanërisht gjatë fundjavave, kur udhëtimi rritet në të dyja drejtimet.
Burim: Epoka e Re
— Redaksia ZHURMA
