KPMShC rrëzon vendimin e Gërvallës për tërheqjen e diplomatit
Ish-ministrja e kishte tërhequr diplomatin A.Ç. vetëm një vit pas emërimit, por vendimi i saj nuk përmbante asnjë arsyetim ligjor.
PRISHTINË — Këshilli i Pavarur Mbikëqyrës për Shërbimin Civil ka rrëzuar vendimin e ish-ministres së Punëve të Jashtme dhe Diasporës, Donika Gërvalla, për tërheqjen e diplomatit me inicialet A.Ç. nga Ambasada e Kosovës në Kroaci. KPMShC ka konstatuar se vendimi i marrë nga ish-kryediplomatja në janar të vitit 2026 ka shkelur ligjin.
Gërvalla e kishte larguar diplomatin nga misioni në Kroaci më 22 janar të vitit 2026, vetëm një vit pasi e kishte emëruar në atë pozitë. Tërheqja e tij ishte bërë pa dhënë asnjë arsyetim për nevojat e institucionit, duke shkelur kështu procedurat për lëvizjet brenda shërbimit diplomatik.
Sipas vendimit të Kolegjit të KPMShC-së, aktvendimi për largimin e diplomatit përbëhej vetëm nga pjesa hyrëse dhe dispozitivi. Vendimi nuk përmbante fare arsyetim dhe këshillë juridike, gjë që bie në kundërshtim me nenin 48 të Ligjit për Procedurën e Përgjithshme Administrative.
Në përfundim të shqyrtimit administrativ, Kolegji i KPMShC-së ka vendosur të rrëzojë vendimin e Gërvallës duke e kthyer çështjen në rivendosje. Ky organ mbikëqyrës ka konstatuar se vendimi nuk përmbante asnjë sqarim se cila ka qenë nevoja e institucionit për këtë tërheqje të parakohshme.
Burim: Vox Kosova
— Redaksia ZHURMA