44 muaj burg dhe 8 vjet dëbim për kosovarin që i grushtoi barkun partneres shtatzënë

ST. GALLEN — Gjykata Kantonale e St. Gallenit, në Zvicrën Lindore, ashpërsoi dënimin ndaj një kosovari nga rajoni i Wilit, i akuzuar për dhunë kundër partneres së tij shtatzënë. Ai u dënua me 44 muaj burgim dhe 8 vjet dëbim nga Zvicra, për tentativë të ndërprerjes së dhunshme të shtatzënisë, lëndim të rëndë trupor, privim të lirisë dhe kërcënim.

I shtyrë nga xhelozia, ai e kishte sharë, pështyrë dhe shtrënguar në fyt deri në humbje të vetëdijes. Më pas e kishte goditur me grushte drejt e në bark, me qëllimin e qartë për ta ndërprerë shtatzëninë — partnerja ishte në javën e nëntë të shtatzënisë.

Seanca e apelit u mbajt pa praninë e të akuzuarit. Përmes avokatit, ai njoftoi se ndodhej në Kosovë, në vendlindjen e prindërve të tij, dhe kërkoi pafajësi për akuzat kryesore. Gjykata Kantonale hodhi poshtë pretendimet e mbrojtjes dhe u rreshtua plotësisht me prokurorinë.

Dëbimi tetëvjeçar u vendos edhe pse i dënuari ka lindur në Zvicër. Prokuroria e arsyetoi masën me mungesën e interesit të tij për fëmijën pas lindjes: sipas saj, ai nuk u përpoq kurrë ta shihte fëmijën apo t'i paguante qoftë edhe një frangë të vetme për rritjen e tij.

Përveç burgimit dhe dëbimit, gjykata i caktoi edhe një gjobë financiare, si dhe masën e trajtimit të detyrueshëm psikiatrik. Ajo rriti ndjeshëm edhe shumën e dëmshpërblimit financiar që i dënuari duhet t'ia paguajë viktimës.

Burim: Lajmi.net
— Redaksia ZHURMA