Sa muaj paraburgim morën nëntë të dyshuarit e skemës naftë-ujë?

PRISHTINË — Gjykata Themelore në Prishtinë u ka caktuar nga një muaj paraburgim nëntë të dyshuarve për kontrabandë me naftë, pastrim parash dhe shmangie tatimi. Arrestimet u bënë më 1 korrik, gjatë aksionit të Prokurorisë Speciale të Kosovës, ndaj të pandehurve F.M., F.M., S.K., N.B., D.M., A.M., M.M., N.M. dhe G.Q.

Akuzat përfshijnë pastrimin e parave, kontrabandimin e mallrave në bashkëkryerje, pjesëmarrjen në grup kriminal të organizuar, mbajtjen e paautorizuar të armëve dhe falsifikimin e parasë. Gjyqtari i procedurës paraprake aprovoi kërkesën e Prokurorisë Speciale përmes aktvendimit të datës 3 korrik, duke caktuar një muaj paraburgim për secilin prej tyre.

Gjykata vlerësoi se paraburgimi është masë adekuate, pasi ekziston rrezik real se, nëse lihen në liri, të pandehurit mund të arratisen për të shmangur përgjegjësinë penale dhe të pengojnë rrjedhën normale të procedurës penale. Gjykata mori parasysh edhe rrezikun që të pandehurit të vazhdojnë bashkëpunimin për kryerjen e veprave të reja penale.

Prokuroria Speciale pretendon se ka zbuluar skemën e një grupi të strukturuar kriminal që kontrabandonte derivate nafte, pastronte para dhe shmangte tatimin. Në krye të grupit, sipas prokurorisë, dyshohet se qëndronte Faruk Mazrek, i njohur më parë si Faik Mazreku, pasuria e të cilit buron nga trafikimi i narkotikëve.

Sipas dosjes, Mazrek organizoi kontrabandimin e naftës nga Shqipëria përmes portit "Porto Romano", ku shitej nafta e vërtetë, ndërsa në Kosovë futeshin cisterna të mbushura me ujë për t'i shmangur kontrollet doganore. Ai dyshohet gjithashtu për shmangie nga tatimi në shumë mbi 50 mijë euro dhe lëshim faturash fiktive.

Paratë, sipas Prokurorisë, hynin në sistemin bankar përmes biznesit "PO PETROLL FARIZ" në Mamushë. Për të fshehur origjinën e tyre të vërtetë, Mazrek pretendohet se mori katër kredi në vlerë 930 mijë euro, për të deklaruar qarkullim të madh financiar.

Djali i tij, Fariz Mazrek, dyshohet të ketë vepruar në bashkëkryerje të plotë, me dijeni të plotë se pasuria e familjes vinte nga trafikimi i narkotikëve. Ai përdori të njëjtin biznes për të deklaruar importe dhe qarkullime fiktive, ndërsa dyshohet edhe për falsifikim të librave të kontabilitetit, duke regjistruar shitje fiktive nafte që në të vërtetë ishte ujë.

Burim: Kallxo
— Redaksia ZHURMA