Kamion me targa të Kosovës merr flakë në Morinë, mbetet i bllokuar mbi 24 orë
Mbi 24 orë pas zjarrit, karroceria e mjetit vijon të bllokojë një korsi të Rrugës së Kombit pranë kufirit.
MORINË — Një kamion me targa të Kosovës u përfshi nga flakët ditën e djeshme në kilometrin e fundit të Rrugës së Kombit, pranë Pikës Kufitare të Morinës. Zjarri dyshohet se ka nisur në gomat e karrocerisë së mjetit, i cili transportonte materiale drusore për industrinë e mobilieve.
Reagimi i shpejtë i drejtuesit të kamionit, me ndihmën e kolegëve dhe banorëve të zonës, bëri të mundur neutralizimin e flakëve, duke shmangur përhapjen e zjarrit.
Pas më shumë se 24 orësh nga ngjarja, karroceria e kamionit vijon të qëndrojë në njërën korsi të Rrugës së Kombit, duke u bërë shkak për krijimin e trafikut pranë Pikës Kufitare të Morinës.
Burim: Gazeta Si
— Redaksia ZHURMA