Hetim ndaj kompanisë Meta për pezullimin e llogarive të protestave
Mbi 30 eurodeputetë i kanë kërkuar Komisionit Evropian të verifikojë veprimet e Metës pas fshirjes së llogarive për protestat në Tiranë.
TIRANË — Komisioni Evropian ka nisur një hetim ndaj kompanisë Meta. Shkak janë bërë bllokimet dhe mbylljet e profileve në rrjetet sociale, të cilat transmetonin zhvillimet e protestave antiqeveritare në Shqipëri. Revista amerikane WIRED bëjë me dije se mbi 30 eurodeputetë i kërkuan Komisionit Evropian verifikimin e përputhshmërisë së këtyre veprimeve me Aktin Evropian për Shërbimet Digjitale (DSA).
Eurodeputetja Alexandra Geese i quajti këto kufizime të ngjashme me censurën. Ajo kritikoi gjithashtu qëndrimin e udhëheqësit të Metës, Mark Zuckerberg, lidhur me lirinë e shprehjes. Këto masa prekën profile që përcillnin të ashtuquajturin “Revolucion të Flamingove” në kryeqytet, tubime që lindën si kundërshti ndaj një projekti për resort luksoz të lidhur me Jared Kushner dhe Ivanka Trump. Pjesëmarrësit kërkojnë largimin nga detyra të kryeministrit Edi Rama dhe ndryshimin e legjislacionit që lejon ndërtime në hapësira të mbrojtura.
Organizata jofitimprurëse Repro Uncensored, e cila merret me shqyrtimin e këtyre rasteve, ka vërtetuar rreth 100 ndërhyrje, ndërsa themeluesja Martha Dimitratou deklaroi se numri i përgjithshëm mund të shkojë në disa qindra llogari të dëmtuara.