Pse Haxhiu i quajti misionet ndërkombëtare të dështuara në ndjekjen e krimeve serbe?

PRISHTINË — Ushtruesja e detyrës së Presidentes së Kosovës, Albulena Haxhiu, ka akuzuar misionet ndërkombëtare se "asnjëherë nuk u morën seriozisht me adresimin e krimeve që Serbia i ka bërë në vendin tonë", gjatë shënimit të Ditës Ndërkombëtare të Eliminimit të Dhunës Seksuale në Konflikt.

"Në Kosovën e pasluftës shumë gjëra u numëruan: shtëpitë e djegura, masakrat, njerëzit e vrarë, të pagjeturit, dëmet, varret, kolonat e gjata. U numërua ajo që shihej. Por ajo që kishte mbetur brenda njeriut mbeti pa emër dhe pa vend në rrëfimin tonë publik", tha Haxhiu.

Ajo e përshkroi dhunën seksuale gjatë luftës si krim që "u mbajt shumë gjatë në heshtje", duke shtuar se krimet seksuale synonin "jo vetëm trupin dhe njeriun, por edhe familjen, bashkësinë, por edhe vetë ndjenjën e sigurisë të një shoqërie të tërë".

Haxhiu theksoi se "turpi nuk u takon personave të dhunuar gjatë luftës", por "atyre që e kryen krimin, atyre që urdhëruan dhe atyre që e mohuan".

Duke folur për mungesën e ndëshkimit, ajo deklaroi: "Asnjë prej misioneve që kishin ardhur që të merren me krimet e luftës, në fakt nuk ishin marrë me krimet e luftës". Megjithatë, pranoi se "vitet e fundit ka pasur përparime", me dënime dhe aktakuza, por shtoi se "kaq shumë krime janë bërë nga Serbia në Kosovë sa që edhe veprimet që janë ndërmarrë vitet e fundit na duken pak".

Haxhiu i bëri thirrje institucioneve të drejtësisë të mos ndalin angazhimin, duke falënderuar posaçërisht Feride Rushitin për punën në fuqizimin e institucioneve të drejtësisë dhe rritjen e numrit të prokurorëve në strategjinë për drejtësinë tranzicionale.

Mesazhi i Haxhiut vjen në një moment kur Kosova po përpiqet të forcojë gjykimin në mungesë për krimet e luftës, por heshtja 26-vjeçare për dhunën seksuale tregon se shteti ende e ka borxh kujdesin ndaj viktimave që organizatat e shoqërisë civile e kanë mbajtur gjallë në mungesë të tij.

Burim: Lajmi.net
— Redaksia ZHURMA