Çfarë ndodhi në vila luksoze të Spanjës?
Autoritetet spanjolle ndaluan tre persona dhe kërkojnë gjashtë të tjerë pas një operacioni kundër një grupi dyshuar kriminal me përbërje shqiptare që grabiti mbi 2 milionë euro
Një grup i dyshuar kriminal me përbërje shqiptare është goditur nga autoritetet spanjolle, pas një operacioni të Guardia Civil në Ishujt Balearë. Tre persona janë ndaluar si të dyshuar për përfshirje në një seri vjedhjesh me forcë në vila luksoze dhe banesa të zonave elitare, ndërsa gjashtë persona të tjerë janë shpallur në kërkim.
Operacioni i koduar “Congre” u zhvillua më 15 korrik nga strukturat e Policisë Gjyqësore të Guardia Civil, me kontrolle në dy banesa në Cala Major të Palmës dhe në Santa Eugènia. Gjatë bastisjeve, hetuesit sekuestruan para cash, dylbi, mjete pune, karta SIM dhe kamera, sende që dyshohet se përdoreshin për organizimin e grabitjeve të tjera.
Sipas hetimeve, grupi dyshohet se ka kryer më shumë se 22 vjedhje gjatë viteve 2025 dhe 2026 në zona rezidenciale me të ardhura të larta si Puerto de Andratx, Badia Gran, Costa d’en Blanes dhe Bendinat. Autoritetet spanjolle dyshojnë se dëmi i shkaktuar nga këto grabitje kalon vlerën e 2 milionë eurove.
Burim: Report Tv, https://report.al/kapet-ne-spanje-grupi-shqiptar-grabiten-mbi-2-milione-euro-ne-vila-luksoze-3-te-arrestuar-dhe-6-ne-kerkim/ — Redaksia ZHURMA