Pse u publikua një fotografi e dyshimtë për shtetasin e humbur në Matkë?

MATKË — Ministria e Punëve të Brendshme publikoi një fotografi të shtetasit të huaj të gjetur në Matkë, e cila ngre dyshime për vërtetësinë e saj. Fotografia, e publikuar në rrjetin social "Fejsbuk", tregon oficerë policie që ndihmojnë personin, por mund të vërehen edhe disa parregullsi vizuale tipike për imazhet e gjeneruara nga inteligjenca artificiale.

Midis tyre, bien në sy mospërputhjet në pamjen e uniformave të policisë, si dhe një dorë e vendosur në çantën e shpinës së personit të shpëtuar e cila, bazuar në kompozimin e fotos, nuk mund të ndërlidhet me asnjërin nga policët e pranishëm.

Për më tepër, sipas deklaratës së Qendrës së Menaxhimit të Krizave, personi është gjetur në orën 03:45 të mëngjesit. Megjithatë, fotografia tregon një varkë me disa persona në sfond, gjë që nuk përputhet me rrethanat e përshkruara në deklaratë, pasi nuk është e zakonshme që trafiku turistik të ketë në ujë në atë kohë.

Edhe pse kjo në vetvete nuk përbën provë se fotografia është gjeneruar nga inteligjenca artificiale, është një element shtesë që ngre dyshime për vërtetësinë e saj. Nga perspektiva etike, në qoftë se institucionet përdorin përmbajtje të krijuar me inteligjencë artificiale, ajo duhet të etiketohet qartë si e tillë, me qëllim që të shmanget mashtrimi i publikut dhe të ruhet besimi në komunikimin zyrtar.

Burim: Portalb, https://portalb.mk/mpb-me-fotografi-te-gjeneruar-nga-inteligjenca-artificialee-informoi-opinionin-per-rastin-me-personin-e-humbur-ne-matke/
— Redaksia ZHURMA